Cəlil Məmmədquluzadənin üç cilddə nəşr olunan “Bütün əsərləri” külliyyatının sonuncu cildinə böyük ədibin felyetonları, məqalələri və məktubları daxil edilmişdir. Mirzə Cəlil yalnız böyük yazıçı və dramaturq deyil, həm də Azərbaycan publisistikasının görkəmli nümayəndələrindən biridir. Bu baxımdan onun zəngin yaradıcılığının mühüm bir hissəsi jurnalistika ilə bağlıdır. Lakin ədib bu sahədəki fəaliyyəti ilə də əsl sənətkar olduğunu nümayiş etdirmiş, qələmə aldığı publisistik nümunələrə yüksək bədii məzmun və ictimai əhəmiyyət qazandırmışdır. Onun yazıları zamanın sınağından çıxaraq bu gün də öz aktuallığını və dəyərini qoruyub saxlayır. Cəlil Məmmədquluzadənin ədəbi-publisistik irsi Azərbaycan mədəniyyət və sənət tarixinin ən qiymətli xəzinələrindən biridir. Bu irsi dərindən öyrənmək, mütaliə etmək və gələcək nəsillərə çatdırmaq hər zaman öz əhəmiyyətini qoruyacaqdır.