1335-ci ildə sürətlə dağılmağa başlayan Elxanlı dövləti əraziləri uğrunda türk-moğol bəyləri və tayfaları arasında varislik mübarizəsi başladı. Bu mübarizədən qalib çıxan cəlayirlər Elxanlı dövlətinin mərkəzi ərazilərini ələ keçirib, öz dövlətlərini yaratdılar. Cəlayirlər dövrü siyasi hakimiyyətin Çingiz soyuna mənsub xanlardan oğuz-türk hökmdarlarına ötürülməsi istiqamətində mühim bir mərhələ təşkil edir. Azərbaycan tarixşünaslığında bu mövzuda yazılan ilk monoqrafiya olması baxımından əsər Cəlayirlər dövlətinin bir əsrlik siyasi tarixiylə yanaşı, Elxanlı sonrası gedən hərbi-siyasi prosesləri də geniş izah edir.