Dahilər haqqında nəsə yazmaq çox çətindir. Onların əsərləri kimi, həyatları da unikaldır, qeyri-adidir, əzəmətlidir. Müəllif əlinizdə tutduğunuz şahanə kitabda bu işin öhdəsindən layiqincə gəlib, böyük Səttar Bəhlulzadənin həyatını da, əsərlərini də ustalıqla təsvir və təhlil edib. Üstəlik, rəssamın bir çox əsərlərinin fotolarını böyük zəhmət hesabına əldə edib. Biz bu kitabda həm müəllifin məqalələrini, həm müasirlərinin Səttar Bəhlulzadə haqqında maraqlı xatirələrini oxuyacaq, həm də böyük rəssamın əsərlərinin əksəriyyəti ilə tanış olacağıq. Kitabda gördüyünüz rəsm əsərləri, daha doğrusu, onların fotoları şəxsi kolleksiyalardan, Azərbaycandakı və dünyanın müxtəlif ölkələrindəki muzeylərdən, sərgilərdən toplanıb. Bunu əminliklə demək olar: bu əsərlərin arasında elə incilər var ki, onları indiyədək çox az adam görüb.