Oktyabrın 8-də Bakı Kitab Mərkəzində ictimai-siyasi xadim, tarix elmləri doktoru Həsən Həsənovun “Birinci Respublikaya aparan yolda” və “Top gurultusu altında diplomatiya” kitablarının təqdimat mərasimi keçirilib. Müəllifin oxuculara təqdim olunan “Birinci Respublikaya aparan yolda” kitabında Azərbaycan və bütün müsəlman dünyası tarixində ilk demokratik respublikanın – Azərbaycan Xalq Cümhuriyyətinin müstəqilliyə gedən yolu və yaranma prosesi əksini tapıb. “Top gurultusu altında diplomatiya” kitabı müəllifin şəxsi diplomatik təcrübəsinə və müstəqil Azərbaycanın BMT-dəki ilk daimi nümayəndəsi kimi fəaliyyətinə dair xatirələrinə əsaslanır. Əsərdə BMT-də Azərbaycanın ilk milli missiyasının yaradılması prosesinin mürəkkəb pərdəarxası məqamları və qarşıya çıxan çətinliklər, eləcə də Ermənistan-Azərbaycan münaqişəsi ilə bağlı BMT Təhlükəsizlik Şurasının ilk dörd bəyanatının və qətnaməsinin hazırlanması, müzakirəsi və qəbulu ilə bağlı təfərrüatlar açıqlanır. Kitablar peşəkar tarixçilər, politoloqlar, gənc diplomatlar, eləcə də Azərbaycanın müasir tarixi ilə maraqlanan geniş oxucu auditoriyası üçün nəzərdə tutulub.