Sentyabrın 16-da Bakı Kitab Mərkəzində Xalq artisti Tofiq Mirzəyevin xatirəsinə həsr olunmuş gecə keçirilib. Tədbiri Əməkdar artist Nərgiz Cəlilova açaraq bildirib ki, Tofiq Mirzəyev sənət fəaliyyətinə musiqiçi kimi başlayıb, sonralar rejissor, aktyor və ssenarist kimi Azərbaycan mədəniyyətinin müxtəlif sahələrinə dəyərli töhfələr verib. Onun yaradıcılıq yolu musiqidən kinoya, televiziyadan aktyorluğa qədər geniş bir sahəni əhatə edib.
Gecə sənətkarın həyat və yaradıcılığına həsr olunmuş videoçarxın nümayişi ilə başlayıb. Bakı Kitab Mərkəzinin direktoru Günel Rzayeva çıxışında Tofiq Mirzəyevin Azərbaycan mədəniyyətində özünəməxsus yer tutduğunu qeyd edib, onun yaradıcılıq irsinin müxtəlif nəsillər üçün əhəmiyyətini vurğulayıb.
Xalq yazıçıları Anar və Çingiz Abdullayev, Xalq artistləri Polad Bülbüloğlu, Fərhad Bədəlbəyli və Murad Hüseynov, Xalq rəssamı Fərhad Xəlilov Tofiq Mirzəyevlə bağlı xatirələrini bölüşüb, onun səmimiyyətindən, sənətə bağlılığından və Azərbaycan mədəniyyətinə verdiyi töhfələrdən söz açıblar. Tədbirdə Tofiq Mirzəyevin həyat yoldaşı, Azərbaycan Respublikasının Əməkdar incəsənət xadimi, professor Elmira Səfərovanın da xatirəsi yad olunub. Gecənin bədii hissəsində gənc musiqiçilərin ifaları təqdim olunub. “Qaya” qrupunun və Xalq artisti Salman Qəmbərovun çıxışları Tofiq Mirzəyevin xatirəsinə həsr olunmuş gecəyə xüsusi duyğusal ab-hava qatıb.