İyulun 15-də Bakı Kitab Mərkəzində baş tutan “Şəhərin yay günləri” adlı musiqi və poeziya gecəsi ədəbiyyat və musiqi həvəskarlarına unudulmaz anlar yaşatdı. İsti yay axşamında keçirilən tədbir tanınmış ziyalıları, mədəniyyət və incəsənət nümayəndələrini, eləcə də şəhər sakinlərini bir araya gətirdi.
Hüseynağa Aslanovun aparıcılığı ilə keçirilən gecə Bakı Kitab Mərkəzinin direktoru Günel Rzayevanın səmimi salamlama nitqi ilə başladı.
Tədbirin yadda qalan anlarından biri Beynəlxalq Muğam Mərkəzinin nəzdində fəaliyyət göstərən Cahangir Cahangirov adına Xorun çıxışı oldu. Dirijor Təranə Yusifovanın bədii rəhbərliyi ilə təqdim olunan musiqi proqramında kollektiv Azərbaycan musiqisinin sevilən nümunələrini — “Bakı haqqında mahnı”, “Üzüyümün qaşı firuzədəndir”, “Bakı qızları”, “Aləm oyansın”, “Güllər” və “Azərbaycan” əsərlərini səsləndirdi. Gecənin ovqatını tamamlayan poeziya nümunələri də tamaşaçılara xüsusi zövq bəxş etdi. Azərbaycan Yazıçılar Birliyinin katibləri Səlim Babullaoğlu və İlqar Fəhmi Azərbaycan poeziyasından seçilmiş şeirləri səsləndirdilər. Xalq artisti Mehriban Zəki pianoçu, beynəlxalq müsabiqələr laureatı Vurğun Vəkilovun müşayiəti ilə Vaqif Səmədoğlunun poeziyasından seçilmiş nümunələri tamaşaçılara təqdim etdi. Musiqi və poeziya axşamı 3 nömrəli Uşaq-Gənclər İnkişaf Mərkəzinin üzvlərinin Tofiq Quliyevin valsı sədaları altında hazırladıqları rəqs kompozisiyası ilə yekunlaşdı.Yay ab-havasını musiqi, poeziya və rəqsin harmoniyası ilə yaşadan bu xüsusi gecə iştirakçılar tərəfindən böyük maraq və rəğbətlə qarşılandı.