İyunun 5-də Bakı Kitab Mərkəzində kinorejissor, ssenarist, Azərbaycanın Xalq artisti Ramiz Fətəliyevin “Черным по белому” kitabının təqdimat mərasimi keçirilib. Təqdimat görkəmli sənətkarın 80 illik yubileyinə həsr olunub. Ramiz Fətəliyev Azərbaycan kino sənətində özünəməxsus iz qoymuş yaradıcı şəxslərdən biridir. Tamaşaçılar onu “Altıncı”, “Yeni evlənənlər üçün çətir”, “Səni dünyalar qədər sevirdim”, “Lətifə”, “Yaramaz” və digər məşhur filmlərin müəllifi kimi tanıyırlar. Tədbirdə yubilyarın ailə üzvləri, dostları, həmkarları, tələbələri, sənət adamları iştirak edib. Xalq artisti Məbud Məhərrəmov, Əməkdar artist Firdovsi Atakişiyev və müəllifin ailə üzvləri kitabdan seçilmiş parçaları səsləndiriblər. Xalq artisti, bəstəkar Faiq Sücəddinovun ifasında musiqi nömrəsi təqdim olunub.  Xalq yazıçıları Anar və Çingiz Abdullayev çıxış edərək Ramiz Fətəliyevin milli kino və mədəniyyətimizin inkişafına verdiyi mühüm töhfələri vurğulayıb, ona ən xoş arzularını çatdırıblar.