Mayın 15-də Bakı Kitab Mərkəzində tanınmış nevroloq, professor, Azərbaycan Tibb Universitetinin Nevrologiya kafedrasının müdiri Aytən Məmmədbəylinin baş redaktorluğu ilə nəşr olunan “Nevrologiyada tibbi genetika” dərsliyinin təqdimatı keçirilib.  Kitabda sinir sisteminin irsi və genetik xəstəlikləri, genetik mutasiyaların nevroloji patologiyalarda rolu, molekulyar-genetik mexanizmlər, genetik analiz və diaqnostika üsulları, həmçinin mitoxondrial və neyrodegenerativ xəstəliklərin genetik əsasları əhatə edilib. Azərbaycan dilində nevrologiyada tibbi genetika sahəsinə həsr olunmuş ilk fundamental nəşr olan dərslik tibb tələbələri, rezidentlər, nevroloqlar, genetiklər, neyrocərrahlar, psixiatrlar və digər ixtisaslı həkimlər üçün nəzərdə tutulub. Tədbirdə Azərbaycan Tibb Universitetinin rektoru, professor Gəray Gəraybəyli, Azərbaycan Dövlət Həkimləri Təkmilləşdirmə İnstitutunun rektoru, professor Nazim Pənahov, həmin institutun Nevrologiya və klinik neyrofiziologiya kafedrasının müdiri, professor Rəna Şirəliyeva və digər çıxış edənlər dərsliyin ölkədə tibbi genetika və nevrologiya sahələrinin inkişafına mühüm töhfə verəcəyini qeyd edib, redaksiya heyətinə gələcək elmi fəaliyyətlərində uğurlar arzulayıblar.