Martın 16-da Bakı Kitab Mərkəzində 3 nömrəli Uşaq-Gənclər İnkişaf Mərkəzinin iştirakı ilə “Novruz xonçası” adlı xeyriyyə şənliyi təşkil olunub. Tədbirə Bakı şəhəri, Sabunçu rayonu 10 nömrəli sanatoriya tipli internat məktəbinin şagirdləri dəvət edilib. Şənlik çərçivəsində Novruzun zəngin adət-ənənələrini əks etdirən rəsm sərgisi təqdim olunub, daha sonra iştirakçılar Bakı Kitab Mərkəzi ilə yaxından tanış olublar. Regional İnkişaf İctimai Birliyinin könüllülərinin iştirakı ilə “Oxu saatı” və əl işləri üzrə maraqlı ustad dərsləri təşkil edilib. Tamaşa zamanı 3 nömrəli Uşaq-Gənclər İnkişaf Mərkəzinin gənc aktyorları Novruzun ruhunu əks etdirən milli və dünya xalqlarının rəqslərini nümayiş etdirib, həmçinin musiqi nömrələri ilə çıxış ediblər. Tədbirin sonunda uşaqlara Bakı Kitab Mərkəzi tərəfindən Novruz sovqatları təqdim edilib, TEAS Press nəşriyyat evi tərəfindən isə kitablar hədiyyə olunub.