Martın 12-də Azərbaycan İdman Akademiyasının tələbələri Bakı Kitab Mərkəzinin rəhbəri, yazıçı-publisist Günel Anarqızı ilə görüş keçiriblər. Görüş  Azərbaycan İdman Akademiyasının “Tələbənin Dostu” maarifləndirici layihəsi çərçivəsində təşkil olunub. Görüşdən əvvəl tələbələr üçün Bakı Kitab Mərkəzi ilə tanışlıq ekskursiyası təşkil edilib. Ekskursiya zamanı iştirakçılar mərkəzin fəaliyyəti, zəngin kitab seçimi və burada yaradılmış müasir şərait haqqında məlumat əldə ediblər. Tədbir zamanı Günel Anarqızı mütaliənin insanın dünyagörüşünün formalaşmasında mühüm rol oynadığını vurğulayaraq gəncləri daha çox kitab oxumağa və öz üzərlərində daim işləməyə təşviq edib. Yazıçı, həmçinin məqsədlərə çatmaq üçün əzmkarlığın və davamlı inkişafın vacibliyini qeyd edib. Görüş interaktiv müzakirə formatında davam edib. Tələbələr yazıçıya müxtəlif suallar ünvanlayaraq onun yaradıcılıq təcrübəsi ilə maraqlanıblar.
Sonda Günel Anarqızı kitablarını tələbələr üçün imzalayaraq onlara hədiyyə edib, həmçinin  xatirə şəkilləri çəkilib.