Martın 11-də Bakı Kitab Mərkəzində Azərbaycan Respublikasının Xalq artisti, tanınmış tarzən Fikrət Verdiyevin xatirəsinə həsr olunmuş “Əbədiyaşar sənətkar” kitabının təqdimatı keçirilib. Tədbirdə çıxış edənlər görkəmli sənətkarın Azərbaycan musiqi mədəniyyətindəki xidmətlərindən bəhs edib, onun zəngin yaradıcılıq yolu və sənət irsi haqqında fikirlərini bölüşüblər. Gecənin bədii hissəsində muğam ifaçılarının iştirakı ilə konsert proqramı təqdim olunub. Konsertdə Azərbaycan Respublikasının Xalq artisti Samir Cəfərov, Əməkdar artist Bəyimxanım Vəliyeva, xanəndələr Mirələm Mirələmov, Kamilə Nəbiyeva və digər ifaçılar çıxış edərək tamaşaçılara unudulmaz anlar yaşadıblar. Qeyd edək ki, mərhum sənətkarın həyat yoldaşı Bəyimxanım Cavanşirova-Verdiyevanın tərtib etdiyi kitabda “Göygöl” və “Neftçi” ansambllarının yaradıcısı və bədii rəhbəri olmuş Fikrət Verdiyevin həyat və yaradıcılığına dair xatirələr, fotoşəkillər yer alıb. Nəşrdə həmçinin sənətkarın dostlarının, doğmalarının və pərəstişkarlarının ürək sözləri də toplanıb.