Fevralın 11-də Bakı Kitab Mərkəzində ADU-nin nəzdində Konfutsi İnstitutunun təşkilatçılığı və Çin Xalq Respublikasının Azərbaycandakı səfirliyinin dəstəyi ilə Çinin Yeni İl bayramına həsr olunmuş musiqi və poeziya gecəsi keçirilib. Tədbiri Bakı Kitab Mərkəzinin direktoru Günel Anarqızı açaraq iki xalq arasında mədəni əlaqələrin əhəmiyyətindən danışıb. Çin Xalq Respublikasının Azərbaycandakı səfirliyinin müşaviri Din Tao Azərbaycan ilə Çin arasında mədəni-humanitar əməkdaşlığın daim inkişaf etdiyini qeyd edib. Konfutsi İnstitutunun əməkdaşı Kəmalə Məmmədova Çinin Yeni İl bayramının qədim və zəngin ənənələrə malik olduğunu vurğulayıb. Rəsmi hissədən sonra tədbir maraqlı və rəngarəng konsert proqramı ilə davam edib. İştirakçılar Çin dilində şeirlər səsləndirib, mahnılar və rəqslər ifa ediblər. Tədbir çərçivəsində Çin xəttatlığı, ağac üzərində oyma və lak rəssamlığı, eləcə də çay mərasimi ənənələrinə həsr olunmuş stendlər nümayiş etdirilib. Qonaqlar qədim Çin sənət nümunələri ilə yaxından tanış olmaq imkanı əldə ediblər.