Yanvarın 28 –də Bakı Kitab Mərkəzində Rəssamlar İttifaqlarının Beynəlxalq Konfederasiyası (RİBK) və Rəssamlar İttifaqının birgə hazırladığı “Azərbaycan təsviri sənəti” albomunun təqdimat mərasimi keçirilib.
 
RİBK-ın 20 illiyinə həsr olunmuş albom “Birliyin Rəssamları” seriyasının yekun nəşridir.
 
Tədbirdə çıxış edən BKM-nin direktoru Günel Rzayeva, Xalq rəssamı Fərhad Xəlilov, Xalq yazıçısı Anar, Əməkdar incəsənət xadimi Ziyadxan Əliyev, Xalq rəssamı Fuad Salayev və başqaları kitabın nəşrinin Rəssamlar ittifaqının həyatında mühüm hadisə kimi qiymətləndirmişlər.
 
Tədbirdə, həmçinin, görkəmli Azərbaycan rəssamları Səttar Bəhlulzadə, Qorxmaz Əfəndiyev, Cavad Mircavadov və Sənan Qurbanovun reproduksiya albomlarının təqdimatı oldu.
Tədbirdə beynəlxalq müsabiqələr laureatı, pianoçu Vüsal Aydəmirovun ifasında caz təranələri səslənib.
 
Qeyd edək ki, Moskvanın “Галарт» nəşriyyatında işıq üzü görmüş “Azərbaycan təsviri sənəti” albomunda Azərbaycanın incəsənət ustalarının 252 rəssamlıq, heykəltəraşlıq və qrafika əsərlərinin reproduksiyaları yer alıb.