Dekabrın 17-də Baku Book Center, "Regional İnkişaf" İctimai Birliyi və 2 nömrəli Uşaq-Gənclər İnkişaf Mərkəzinin birgə təşkilatçılığı ilə “31 Dekabr – Dünya Azərbaycanlılarının Həmrəyliyi Günü” və Yeni il münasibətilə növbəti xeyriyyə şənliyi keçirilib.Tədbirə 10 nömrəli sanatoriya tipli internat məktəbinin sakinləri dəvət olunub. Bakı Kitab Mərkəzinin əməkdaşları tərəfindən uşaqlar üçün qısa tanıtım ekskursiyası təşkil edilib. Daha sonra "Regional İnkişaf" İctimai Birliyi və 2 nömrəli Uşaq-Gənclər İnkişaf Mərkəzinin təşəbbüsü ilə uşaqlar üçün maarifləndirici və interaktiv xarakterli master-klasslar, həmçinin Yeni il mövzusunda “Oxu saatı” keçirilib.Xeyriyyə şənliyində 2 nömrəli Uşaq-Gənclər İnkişaf Mərkəzinin “Teatr sənəti” dərnəyinin üzvləri “Macəra diyarında Şahzadə və Xilaskarlar” adlı tamaşa təqdim ediblər. Eyni zamanda “Təbəssüm” rəqs qrupunun rəngarəng çıxışları bayram sədaları altında nümayiş olunaraq tədbirə əsl şənlik ab-havası qatıb. Tədbirin əsas məqsədi həmrəylik və birlik ruhunu gücləndirmək, uşaqlara qayğı göstərərək onlara unudulmaz anlar yaşatmaq, yaradıcılıq və bacarıqlarının inkişafına dəstək olmaq, eləcə də Yeni ilin sevincini paylaşaraq cəmiyyətə ümid və sevgi mesajı çatdırmaq olub. Sonda balaca qonaqlara Bakı Kitab Mərkəzi və SOCAR tərəfindən hədiyyələr təqdim edilib.