Dekabrın 16-da Bakı Kitab Mərkəzində yazıçı Gülər Coşqunsoyun “Milli Xilaskar” və “Ulu Röya Yolunda” adlı kitablarının təqdimatı və imza günü keçirilib. Tədbirin əvvəlində Ulu Öndər Heydər Əliyevin və Azərbaycan Respublikasının ərazi bütövlüyü uğrunda şəhid olmuş qəhrəmanlarımızın xatirəsi bir dəqiqəlik sükutla yad edilib. Ardınca Azərbaycan Respublikasının Dövlət Himni səsləndirilib. Daha sonra tədbirin aparıcısı Dilbər Coşqunsoy yazıçı və təqdim olunan kitablar haqqında qısa məlumat verib. Ardınca Gülər Coşqunsoy çıxış edərək kitabların yazılma məqsədi, mövzusu və məzmunu barədə ətraflı danışıb. Tədbirdə çıxış edən qonaqlar əsərlər haqqında fikirlərini bölüşüblər. Sonda müəllif qonaqlar üçün kitablarını imzalayıb, xatirə şəkilləri çəkilib. Qeyd edək ki, “Milli Xilaskar” Azərbaycan dövlətçilik tarixi və Prezident İlham Əliyevin fəaliyyətini əks etdirən ilk iri həcmli poema və pyesdən ibarət əsərdir. “Ulu Röya Yolunda” isə 2023-cü ilə qədər elan edilmiş bütün Azərbaycan Milli Qəhrəmanlarına və şəhid general Polad Həşimova həsr olunmuş ilk genişhəcmli poemadır.