Dekabrın 9-da Bakı Kitab Mərkəzində Qarabağ Dirçəliş Fondunun sifarişi ilə hazırlanan “Revival of Karabakh: The Story of Azerbaijan’s Renaissance”  (“Qarabağın Dirçəlişi: Azərbaycan İntibahının Hekayəsi”) kitabının təqdimat mərasimi keçirilib. Nəşr Qarabağın tarixi, onun azad olunması və bərpa prosesini əhatəli şəkildə təqdim edir. Kitabda mətnlə yanaşı fotoşəkillər, rəsmi şəxslər və ekspertlərlə müsahibələr, həmçinin doğma yurdlarından didərgin düşmüş insanların xatirələri yer alır.
Tədbirin əvvəlində Dövlət Himni səsləndirilib, ardınca Vətənin suverenliyi və ərazi bütövlüyü uğrunda canından keçmiş şəhidlərin xatirəsi bir dəqiqəlik sükutla yad edilib.
Qarabağ Dirçəliş Fondunun İdarə Heyətinin sədri Rəhman Hacıyev çıxış edərək kitabın əhəmiyyəti və hazırlanma prosesi barədə ətraflı məlumat verib.
Digər natiqlər də öz çıxışlarında nəşrin əhəmiyyətini vurğulayaraq, kitabın Qarabağda baş verən hadisələrlə bağlı həqiqətlərin beynəlxalq auditoriyaya çatdırılmasına mühüm töhfə verəcəyinə əminliklərini ifadə ediblər. Rəsmi çıxışlardan sonra tədbir iştirakçıları kitabın videotəqdimatını izləyiblər. Daha sonra kitabın müəllifi, britaniyalı yazıçı Qrem Vilson tədbir iştirakçılarının ona ünvanladıqları sualları cavablandırıb. Qeyd edək ki, nəşr tam şəkildə www.book.revival.az platformasına inteqrasiya edilib.