Noyabrın 28-də Bakı Kitab Mərkəzində Prezident mükafatçısı, sənətşünaslıq üzrə fəlsəfə doktoru, Mədəniyyət kanalının direktor müavini, şair-publisist Bəhruz Niftəliyevin “Tanrıya məktublar” kitabının təqdimat mərasimi keçirilib. Tədbirdə Milli Məclisin deputatları, elm və mədəniyyət xadimləri, həmçinin media nümayəndələri iştirak ediblər. Bakı Kitab Mərkəzinin direktoru Günel Anarqızı yeni nəşr haqqında fikirlərini bölüşərək bildirib: “Müəllifin şeirləri Allaha inanmaqla Onu hiss etmək arasındakı mənəvi keçidi incə poetik çalarlarla ifadə edir. Kitab insanın daxili dialoqunu, ruhun dərinliklərində gizlənən cavabsız düşüncələri oxucuya çatdırmağı bacarır”. Milli Məclisin deputatı Elçin Mirzəbəyli Bəhruz Niftəliyevi ruhdaşı kimi dəyərləndirərək deyib: “Onunla müxtəlif poetik ruhların bir araya gəldiyi səmimi və mənalı söhbətlər etmişik. Müəllifin hər misrası mənə doğma və yaxın gəlir”.

Deputat Jalə Əliyeva belə tədbirlərin sözün, poeziyanın və ədəbiyyatın dəyərini daha dərindən anlamağa imkan yaratdığını qeyd edib. Akademik Nizami Cəfərov Bəhruz Niftəliyevin şair kimi fəaliyyətindən xəbər tutanda heyrətləndiyini bildirib və vurğulayıb ki, müəllif istedadı ilə seçilən yaradıcı şəxsdir. Onun sözlərinə görə, şeirlərinin quruluşunda sual və nida intonasiyalarının üstünlük təşkil etməsi Bəhruz Niftəliyevin fərqli poetik üslubunun əsas göstəricilərindəndir.

Azərbaycan Mətbuat Şurasının sədri Rəşad Məcid poeziyaya üz tutmağın böyük məsuliyyət tələb etdiyini vurğulayaraq müəllifə yaradıcılıq uğurları arzulayıb. Mədəniyyət kanalının direktoru, Əməkdar artist Dilarə Səlim bildirib: “Ədəbiyyat, söz, musiqi və incəsənət ətrafında toplaşan bu birlik yüksək mənəvi dəyər deməkdir. Bəhruz Niftəliyevin sözə hörməti, mədəniyyətə sevgisi və ümumi ideya, amal və dəyərlərə bağlılığı onun yaradıcılığının əsas xəttini təşkil edir”.

Tanınmış alim, şair, professor Mahirə Nağıqızı müəlliflə birgə efir təcrübəsini xatırladaraq onun yaradıcı düşüncəsinə yüksək qiymət verib. Digər çıxışçılar da kitabın ideya xəttindən, müəllifin poetik üslubundan və “Tanrıya məktublar”ın müasir oxucuya təsir gücündən söz açıblar. Tədbir bədii hissə ilə davam edib. Sonda müəllif oxucular üçün kitabını imzalayıb.