Noyabrın 15-də Bakı Kitab Mərkəzində maliyyə və mühasibatlıq sahəsində peşəkar mütəxəssis Faiq Abdullayevin “Mühasibat uçotu: Praktiki tətbiqi və nəzəri təhlili” adlı kitabının birinci hissəsinin təqdimatı keçirilib. Təqdimat zamanı müəllif Faiq Abdullayev kitabın yaranma ideyası, məqsədi və onun mühasibat uçotunun praktiki və nəzəri tərəflərinə necə yönəldildiyi barədə geniş məlumat verib. O, kitabın mühasibatlıq sahəsində çalışan peşəkarlar, tələbələr və digər maraqlanan şəxslər üçün nəzərdə tutulduğunu vurğulayıb və onun gündəlik işdə tətbiqinin praktik faydalarından danışıb. Tədbirdə həmçinin maliyyə və mühasibatlıq sahəsində mütəxəssislər çıxış edərək kitabın məzmunu, strukturu və praktiki tətbiq imkanlarını yüksək qiymətləndiriblər. Kitabın mahiyyətinə dair fikirlərini bildirən iştirakçılar qeyd ediblər ki, əsər həm nəzəri bilikləri, həm də praktik nümunələri ilə oxucular üçün olduqca faydalıdır.