İyulun 15-də Bakı Kitab Mərkəzində İqtisadi İslahatların Təhlili və Kommunikasiya Mərkəzi (İİTKM) ilə Bakı Dövlət Universitetinin (BDU) birgə təşkilatçılığı ilə Milli Mətbuatın 150 illik yubileyi çərçivəsində “İctimaiyyətlə əlaqələrin əsasları” adlı dərs vəsaitinin təqdimat mərasimi keçirilib. Tədbirdə İqtisadi İslahatların Təhlili və Kommunikasiya Mərkəzinin icraçı direktoru, iqtisad elmləri doktoru Vüsal Qasımlı, Bakı Dövlət Universitetinin rektoru Elçin Babayev və digər çıxış edənlər dərs vəsaitinin piar sahəsinin nəzəri və praktiki əsaslarını əhatə edən fundamental bir nəşr olduğunu vurğulayıblar. Bildirilib ki, kitabda ictimaiyyətlə əlaqələrin tarixi inkişafı, nəzəriyyələri və əsas prinsipləri ətraflı şəkildə təqdim olunur. Müəlliflər dövlət və özəl sektorda auditoriyalarla münasibətlərin tənzimlənməsi üzrə strategiya, plan və proqramları, eləcə də böhran vəziyyətlərinin idarə olunması kimi aktual mövzuları əhatə ediblər. Həmçinin, mətbuatla əməkdaşlıq, press-relizlərin hazırlanması, sosial media ilə iş və digər praktik alətlər real nümunələrlə izah edilib. Dərs vəsaitində ictimaiyyətlə əlaqələr sahəsində formalaşan yeni tendensiyalar, o cümlədən rəqəmsal texnologiyaların və süni intellektin tətbiqi də araşdırılıb. Tədbirin sonunda İqtisadi İslahatların Təhlili və Kommunikasiya Mərkəzi ilə Bakı Dövlət Universiteti arasında əməkdaşlığa dair memorandum imzalanıb.