Düzgün qidalanma sağlamlığın əsas şərtlərindən biridir. Təsadüfi deyil ki, xəstəliklərin böyük əksəriyyəti məhz düzgün qidalanmama nəticəsində orqanizmdə maddələr mübadiləsinin pozulması ilə əlaqədardır. Təəssüf ki, əhalinin əhəmiyyətli bir hissəsi qidalanma qaydaları barədə kifayət qədər məlumata malik deyil.Bu və digər məsələlər mayın 15-də Bakı Kitab Mərkəzində “YüksƏl” maarifləndirmə layihəsinin “Yaz seminarları” çərçivəsində təşkil olunan növbəti tədbirdə geniş şəkildə müzakirə olunub. Seminarda Bakı Dövlət Universitetinin tələbələri iştirak ediblər.Seminar zamanı həkim-diyetoloq Tutu Zeynalova iştirakçılara faydalı məlumatlar təqdim edib. “Sağlam gələcək üçün qidalanma” mövzusunda keçirilən seminarda həkim insan orqanizmi üçün vacib olan qidalar, makro və mikro qida maddələri, sağlam həyat tərzi, düzgün qidalanmanın əsas prinsipləri barədə ətraflı məlumat verib.Daha sonra seminar interaktiv dialoq şəklində davam edib. Sonda iştirakçılara Bakı Kitab Mərkəzi tərəfindən kitablar hədiyyə olunub.