Mayın 14-də bp “Azərbaycan. Tarixi-coğrafi atlas” və “Azərbaycan. Tarixi-etnoqrafik atlas” adlanan nəhənq kitab-albomları ictimaiyyətə təqdim edib. Bakı Kitab Mərkəzində baş tutan təqdimat mərasimində tanınmış tarixçilər, alimlər və mədəniyyət xadimləri iştirak ediblər. Kitabların müəllifi - tanınmış alim, ictimai və dövlət xadimi, tarix elmləri doktoru, professor Həsən Həsənovdur.
Tədbirdə Bakı Kitab Mərkəzinin direktoru Günel Rzayeva, bp-nin Xəzər regionunda xarici əlaqələr və kommunikasiya üzrə vitse-prezidenti Bəxtiyar Aslanbəyli, bp-nin region üzrə kommunikasiyalar rəhbəri Tamam Bayatlı və digər çıxışçılar tədqiqat işinin böyük əhəmiyyətini vurğulayıblar. Bildirilib ki, bu nəşrlər regionun tarixi inkişafı ilə maraqlanan alimlər, tədqiqatçılar və geniş oxucu kütləsi üçün dəyərli bir mənbə olacaq. Tədbir professor Həsən Həsənovun çıxışı ilə davam edib. Qeyd edək ki, ümumilikdə 564 səhifədən ibarət olan və Azərbaycan və İngilis dillərində nəşr edilən kitablar ölkənin müxtəlif kitabxanalarına, ali təhsil müəssisələrinə və elmi-tədqiqat institutlarına hədiyyə ediləcək.