Martın 5-də Bakı Kitab Mərkəzində Azərbaycan təhsilinin və mədəniyyətinin inkişafında misilsiz xidmətləri olan, maarifpərvər ziyalı Həbib bəy Mahmudbəyovun 160 illik yubileyi qeyd olunub. Tədbirin əvvəlində qonaqlara Həbib bəy Mahmudbəyov haqqında videoçarx təqdim olunub. Sonra AMEA Riyaziyyat və Mexanika İnstitutunun direktoru Misir Mərdanov,  Azərbaycan Memarlar İttifaqının sədri Elbay Qasımzadə, Millət vəkili, Milli Məclisin Elm və təhsil komitəsinin sədri Anar İsgəndərov, Filologiya üzrə fəlsəfə doktoru Şərəf Cəlilli, 2 nömrəli Texniki Humanitar liseyin direktoru Turanə Məcidli,  Bakı Şəhəri üzrə Təhsil İdarəsinin müdiri Nərminə Hüseynova, Xalq artisti Nurəddin Mehdixanlı, Əməkdar rəssam Rza Avşar və digərləri çıxış ediblər. Onlar çıxışlarında qeyd ediblər ki, Həbib bəy Mahmudbəyovun həyat və fəaliyyəti yalnız öz dövründə deyil, eyni zamanda bugünkü nəsillər üçün də önəmli bir ilham mənbəyidir. Natiqlər Azərbaycanın təhsili və mədəniyyətinin inkişafında misilsiz xidmətləri olan, maarifçi və ziyalı Həbib bəy Mahmudbəyovun irsinin təbliği və tanınması istiqamətində gördükləri işlərə görə dövlət başçısı İlham Əliyevə və Birinci xanım Mehriban Əliyevaya minnətdarlıqlarını bildiriblər. Böyük şəxsiyyətin nəslinin nümayəndəsi Eldar Əzizov ulu babası haqqında öz fikirlərini iştirakçılarla bölüşərək yubiley tədbirinə görə öz təşəkkürünü bildirib. Tədbirdə Əməkdar rəssam Rza Afşar müəllifi olduğu Həbib bəy Mahmudbəyovun portretini liseyin kollektivinə hədiyyə edib. İncəsənət xadimlərinin ifasında Qara Qarayevin “Yeddi gözəl” baletindən vals, Xəyyam Mirzəzadənin “Minatürlər”i, Mirzə Fətəli Axundzadənin “Hacı Qara” əsərindən kiçik bir səhnə tədbirə xüsusi bir rəng qatıb.