Fevralın 20-də Azərbaycan Respublikası Milli Məclisinin deputatı Nigar Arpadarai Bakı Kitab Mərkəzində “Gələcəyin çağırışları və imkanları gənclərimizə nəyi vəd edir?!” mövzusunda seminar keçirib. “YüksƏL” maarifləndirmə layihəsinin “Qış seminarları” çərçivəsində təşkil olunan seminarda Azərbaycan Könüllü Təşkilatları İttifaqının 70-dən çox könüllüsü iştirak edib.
Keçid dövrü barədə söz açan Nigar Arpadarai, bu dövrün gənclər üçün həm çətinliklər, həm də yeni fürsətlər yaratdığını qeyd edib. O, süni intellektin həyatımıza sürətlə daxil olmasının potensial imkanlarını nəzərə alaraq, gənclərə bu texnologiyalardan necə faydalana biləcəklərini izah edib. 
Seminarın digər mövzusu gələcəkdə bəzi peşələrin süni zəkanın ixtiyarına keçməsi və yeni peşələrin ortaya gəlməsi olub. Süni intellektin demək olar ki, hər sahədə transformasiyaya səbəb olduğunu vurğulayan Nigar Arpadarai, gənclərin bu transformasiyaya uyğunlaşdırılmasının vacib olduğunu bildirib. 
Seminar zamanı gənclər qonağa süni intellekt və texnoloji inkişafla bağlı suallar ünvanlayıb və seminar dialoq şəraitində davam edib. Sonda tədbir iştirakçılarına Baku Book Center tərəfindən kitablar hədiyyə edilib.