Yanvarın 30-da biznes etiket və müqavilələrin bağlanması üzrə ekspert, beynəlxalq təlimçi, Etika Akademiyasının rəhbəri Günel İbrahim “İşgüzar görüş zamanı ilk 5 dəqiqə” mövzusunda seminar keçirib.Seminar Heydər Əliyev Fondunun və Bakı Kitab Mərkəzinin təşəbbüsü və BP şirkətinin maliyyə dəstəyi ilə reallaşdırılan “YÜKSƏL” layihəsi çərçivəsində təşkil olunub.

Tədbirdə Azərbaycan Dövlət İqtisad Universitetinin, Azərbaycan Dillər Universitetinin və Azərbaycan Dövlət Neft və Sənaye Universitetinin tələbələri, habelə Təhsil Nazirliyinin “Bir” Tələbə-Könüllü Proqramının nümayəndələri iştirak edib.

Seminarda iştirakçılar işgüzar görüş zamanı ən yüksək nəticəni əldə etmək üçün alimlərin son ixtiralarına əsaslanan təsir mexanizmlərini öyrəniblər. Aparıcı işgüzar görüşün müsbət nəticələrini qazanmaq üçün vacib olan amillərdən, o cümlədən, qeyimdə rənglərin təsiri, jestlərin rolu, vaciblik hissinin ödənilməsi, nitqin aydınlığı, vaxt məhdudiyyətindən və s. vacib amillərdən danışdı.

Günel İbrahim, həmçinin, səbr, nəzakət, diplomatiya, sakitlik, özünə inam və özünü düzgün təqdim etmək bacarıqları kimi vacib sayılan keyfiyyətlərin rolundan söhbət açdı. Sonda iştirakçılara G. İbrahim tərəfindən məsləhət görülmüş kitablar hədiyyə olundu.