Noyabrın 27-də Bakı Kitab Mərkəzində Azərbaycan Dövlət Mədəniyyət və İncəsənət Universitetinin Ədəbiyyat və dillər kafedrasının müdiri, filologiya üzrə elmlər doktoru Fəridə Səfiyevanın “İrəvan: Tarixi Həqiqətlər və Şəxsiyyətlər” adlı kitabının təqdimatı keçirilib.
Təqdimat mərasimində tanınmış elm və mədəniyyət xadimləri çıxış edərək, əsər haqqında dəyərli fikirlərini iştirakçılarla bölüşüblər. Gecənin aparıcısı, Əməkdar mədəniyyət işçisi, publisist Telli Pənahqızı, Baku Book Center-in rəhbəri Günel Rzayeva, AMEA-nın müxbir üzvü, fizika-riyaziyyat elmləri doktoru Misir Mərdanov, tarix elmləri doktoru, professor Dilarə Seyidzadə, Azərbaycan Dövlət Mədəniyyət və İncəsənət Universitetinin rektoru Ceyran Mahmudova, tarix üzrə fəlsəfə doktoru, AMEA  A. A. Bakıxanov adına Tarix və Etnologiya İnstitutunun “Qərbi Azərbaycan tarixi” şöbəsinin müdiri Cəbi Bəhramov, siyasi və dövlət xadimi, tarix elmləri doktoru, professor Həsən Həsənov, Azərbaycan Atatürk Mərkəzinin beynəlxalq əlaqələr şöbəsinin müdiri, jurnalist Nazir Əhmədli və digər çıxış edənlər müəllifin elmi fəaliyyətini yüksək qiymətləndirərək, ona gələcəkdə yeni uğurlar, elmi tədqiqatlarında müvəffəqiyyətlər və daha böyük nailiyyətlər arzulayıblar.
Kitabın müəllifi Fəridə Səfiyeva tədbirə toplaşan bütün qonaqlara və təqdimatın təşkilinə görə Bakı Kitab Mərkəzinin rəhbərliyinə təşəkkürünü bildirib.
Azərbaycan və ingilis dillərində tərtib olunmuş kitab-albomda Azərbaycanın qərbində yerləşən torpaqlar (indiki Ermənistan ərazisi), bu ərazilərin tarixi, İrəvan xanlığının yaranması, İrəvanın tarixi abidələri, elm və mədəniyyət mərkəzləri, İrəvanın görkəmli ziyalıları və onların ailə şəcərələri haqqında ətraflı məlumat yer alıb. Kitab, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə hazırlanıb.