Fevralın 13-də tanınmış jurnalist, tədqiqatçı, siyasi elmlər üzrə fəlsəfə doktoru Aynur Bəşirli «Sevdiklərimiz və sevmədiklərimiz...» mövzusunda tələbələrə mühazirə oxudu.
 
Mühazirə Heydər Əliyev Fondunun və Bakı Kitab Mərkəzinin təşəbbüsü və BP şirkətinin maliyyə dəstəyi ilə reallaşdırılan “YÜKSƏL” layihəsi çərçivəsində gerçəkləşib.
 
Tədbirdə BDU, Xəzər Universiteti, ADNSU, ADU, Bakı Mühəndislik Universiteti, Bakı Qızlar Universiteti, Azərbaycan Universiteti, Bakı Neft-Energetika Kollecinin tələbələri, habelə Təhsil Nazirliyinin “Bir” Tələbə-Könüllü Proqramının nümayəndələri iştirak etdi. Mühazirə zamanı Aynur Bəşirli cəmiyyətdə və mediada sosial, mədəni və gender stereotiplərindən, onların insanların seçiminə təsirindən bəhs etdi.
 
Mühazirəçi, həmçinin, stereotiplərin yaranması , formalaşması, onların həyatımızdakı təzahürü və onlardan çəkinmə vaxtı ortaya gələn kreativlikdən danışaraq həyatdan çox sayda əyani misallar gətirdi. Tədbirdə, həmçinin, stereotiplərlə bağlı məsələlər ətrafında diskussiya aparıldı. Sonda iştirakçılara A.Bəşirli tərəfindən məsləhət görülmüş kitablar hədiyyə olundu.