Oktyabrın 3-də Bakı Kitab Mərkəzində gender bərabərliyi üzrə beynəlxalq ekspert və iş yerində müxtəliflik və inklüzivlik sahəsində sertifikatlı mütəxəssis Dr. Aysel Vəzir “Beynəlxalq təşkilatlarda ekspert karyerası” mövzusunda ingilis dilində seminar keçirib.
Seminarda Aysel Vəzir beynəlxalq təşkilatlarda ekspert karyerasını qurmağın çətinlikləri və üstünlükləri haqqında danışıb, eyni zamanda müxtəlif mühitlərə uyğunlaşmanın vacibliyini vurğulayıb. 
O, bu işin dinamik xarakterini qeyd edərək iştirakçıları mədəni müxtəlifliyi və dəyərləri qəbul etməyə təşviq edib: "Səyahət etməkdən, yeni insanlarla tanış olmaqdan, çətin şəraitdə işləməkdən, innovativ layihələr qurmaqdan zövq alırsınızsa, bu sahədə uğur qazanacaqsınız”.
Aysel Vəzir beynəlxalq ekspertlərin işinin müxtəlif vəzifələrdən ibarət olduğunu, o cümlədən təhlil, tədqiqat, siyasətin işlənib hazırlanması, danışıqlar, yardım, texniki ekspertiza və potensialın yaradılması ilə əlaqəli olduğunu bildirib. 
Eyni zamanda, o, Şərqi Avropa, Mərkəzi Asiya, Afrika və Yaxın Şərqdə müharibədən zərər çəkmiş regionlarda BMT-nin regional proqramları ilə əməkdaşlığı haqqında da məlumat verib. 
Bakı Kitab Mərkəzinin maarifləndirici “YüksƏL” layihəsi çərçivəsində təşkil etdiyi seminarda ADA Universiteti, Azərbaycan Dillər Universiteti və Azərbaycan Dövlət İqtisad Universitetinin tələbələri iştirak ediblər.