Sentyabrın 30-da Bakı Kitab Mərkəzində BDU Hüquq fakültəsinin dekanı, hüquq üzrə fəlsəfə doktoru, dosent  Zaur Əliyevin “Ulu Öndər Heydər Əliyev və hüquq elminin inkişafı” adlı kitabın təqdimatı keçirilib. Kitab, müasir Azərbaycan dövlətinin qurucusu, Ulu Öndər Heydər Əliyevin 100 illik yubileyinə həsr olunub. Tədbirdə Zaur Əliyev kitabın məzmunu haqqında məlumat verərək, Ümummilli Lider Heydər Əliyev tərəfindən hüquq sahəsində milli kadrların hazırlanması ilə bağlı verilən göstərişlərin, eləcə də Ulu Öndərin bu sahədə apardığı islahatların hüquq elminin və hüquq təhsilinin yeni mərhələdə inkişafını təmin etdiyini vurğulayıb.
BDU Hüquq fakültəsinin İnsan Hüquqları və İnformasiya Hüququ UNESCO kafedrasının müdiri, hüquq elmləri doktoru Turqay Hüseynovun moderatorluğu ilə keçirilən tədbirdə dövlət qurumlarının nümayəndələri, hüquqşünaslar, elm xadimləri, BDU-nun professor-müəllim heyəti və tələbələr iştirak ediblər.
Kitabda Ulu Öndər Heydər Əliyevin Azərbaycan hüquq elmi və təhsilinin inkişafında misilsiz xidmətləri hüquqi-nəzəri aspektdən geniş şəkildə şərh olunub. Kitabda həmçinin, Ulu Öndər Heydər Əliyevin təhsil, o cümlədən hüquq təhsili haqqında kəlamları da öz əksini tapıb.