Pulun əhəmiyyətini heç kim inkar etmir, hətta bir çoxları həyatın mənasını varlanmaqda görür. Mütəxəssislər iddia edirlər ki, pul yalnız düzgün xərcləndikdə xeyir gətirə bilər. Bəs biz pulu düzgün xərcləyə bilirikmi? Bu və digər suallar sentyabrın 26-da Bakı Kitab Mərkəzində gənclər üçün keçirilən maarifləndirici “YüksƏl” layihəsi çərçivəsində “Biz pulu necə xərcləməliyik?” adlı seminarda müzakirə olunub.
İqtisadçı və sahibkar Qafar Demirçi tərəfindən təqdim olunan seminarda Bakı Dövlət Universiteti, Azərbaycan Dövlət İqtisad Universiteti, Bakı Musiqi Akademiyasının tələbələri və Gənclərin İnkişaf və Karyera Mərkəzinin könüllüləri iştirak edib.
Qafar Demirçi seminar zamanı “Kasıbçılıq pul problemi deyil, daha çox yanaşma, tənbəllik və məsuliyyətsizlik problemidir” deyib. O, insanların gəlirlərini və xərclərini düzgün proqnozlaşdırmalı, hesabatlarını dəqiq aparmalı olduqlarını vurğulayıb.
Mütəxəssis, maliyyə savadlılığının hər kəs üçün vacib olduğunu bildirib. Hər kəs gəlirindən asılı olaraq müəyyən vəsait yığır, investisiyalar edir, borc alır və büdcəsini formalaşdırır.
Seminarda iştirakçıların çoxsaylı sualları cavablandırılıb və tədbirin sonunda onlara mövzuya aid kitablar hədiyyə edilib.
Seminar “YüksƏl” layihəsinin “Payız seminarları” adlı beşinci mərhələsi çərçivəsində təşkil olunub. Qeyd edək ki, “Payız seminarları” Bakı Şəhər İcra Hakimiyyətinin dəstəyi ilə gerçəkləşir.