Sentyabrın 20-də Bakı Kitab Mərkəzində “A grammar of contemporary Azerbaijani” (“Müasir Azərbaycan dilinin qrammatikası”) adlı dərs vəsaitinin təqdimatı keçirilib. 
Kitabın müəllifləri Azərbaycan Dillər Universitetinin Beynəxalq Əlaqələr üzrə prorektoru Jalə Qəribova və Azərbaycan dilçiliyi kafedrasının baş müəllimi Səbinə Əliyevadır.  
Kitab Azərbaycan Respublikasının Diasporla İş üzrə Dövlət Komitəsinin dəstəyi ilə nəşr edilib.
Təqdimatda Heydər Əliyev Fondunun vitse-prezidenti Leyla Əliyeva, Bakı Media Mərkəzinin rəhbəri Arzu Əliyeva, Azərbaycanın tanınmış elm, mədəniyyət və ictimaiyyət xadimləri iştirak ediblər. 
Kitabın müəllifləri çıxış edərək, Azərbaycan dilini öyrənmək istəyən əcnəbilər üçün hazırladıqları vəsaitin əhəmiyyətini vurğulayıblar.
Eyni zamanda, Azərbaycan Respublikasının Diasporla İş üzrə Dövlət Komitəsinin sədri Fuad Muradov, kitabın redaktoru, Azərbaycan Dillər Universitetinin rektoru Kamal Abdulla, Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynov və Dövlət Dil Komissiyası yanında Monitorinq Mərkəzinin direktoru Sevinc Əliyeva çıxış edərək, müəllifləri yüksək səviyyəli vəsait ərsəyə gətirdiklərinə görə təbrik ediblər. Onlar bu cür dərsliklərin Azərbaycan dili öyrənənlər üçün nə qədər vacib olduğunu da vurğulayıblar.
Tədbirin sonunda beynəlxalq müsabiqələr laureatı İslama Abdullayeva Fəqan Həsənlinin müşayiəti ilə Fikrət Əmirovun "Evləri var xana-xana" mahnısını ifa edib.