Bakı Kitab Mərkəzi gənclər üçün “YüksƏl” layihəsi çərçivəsində Payız seminarlarına başlayıb. Sentyabrın 19-da “Biz dilimizdə necə danışırıq?” mövzusunda ilk seminar keçirilib. Dövlət Dil Komissiyası yanında Monitorinq Mərkəzinin direktoru Sevinc Əliyeva və telejurnalist, Əməkdar artist Nərgiz Cəlilova tərəfindən təqdim olunan seminarda Bakı Dövlət Universiteti, Azərbaycan Dövlət Pedaqoji Universitetinin tələbələri, Gənclərin İnkişaf və Karyera Mərkəzindən, RİİB və ASAN təşkilatlarından könüllülər iştirak edib.
Bakı Kitab Mərkəzinin direktoru Günel Rzayeva, seminar iştirakçılarını salamlayaraq, layihənin gerçəkləşməsində göstərdikləri dəstəyə görə Bakı Şəhər İcra Hakimiyyətinə dərin təşəkkürünü bildirib. 
Daha sonra Sevinc Əliyeva və Nərgiz Cəlilova müasir Azərbaycan dili ilə bağlı çağırışlardan bəhs edib. Məruzəçilər vurğulayıblar ki, ədəbi dilimizin qanun-qaydalarına əməl edilməsi çox vacibdir. Yazıda və danışıqda məntiqli olmaq, sözləri düzgün ifadə etmək, ahəngimizə, sözlərin düzülüşünə və cümlənin quruluşuna diqqət yetirmək zəruridir. Bu sahədə hələ də mövcud olan qüsurları qeyd edən məruzəçilər, Azərbaycan dilində səlis danışan tanınmış diktorlar və dilçi alimlərin telekanallara dəvət edilməsinin vacibliyini vurğulayıb.
Qeyd olunub ki, Ortaq Türk Əlifbası təklifi ilə bağlı əldə olunmuş razılıq da türk xalqları arasında qarşılıqlı anlaşmanın inkişafına və onların dillərinin qorunmasına töhfə verəcək.
Daha sonra iştirakçıların sualları cavablandırılıb. Seminarın sonunda iştirakçılara mövzuya aid kitablar hədiyyə edilib.
Qeyd edək ki, “YüksƏl” layihəsinin əsas məqsədi gənclərin intellektual imkanlarını və dünyagörüşünü genişləndirmək, onların aktual problemlərə və çağırışlara marağını artırmaq, cəmiyyətlə bağlı mövzuları dərindən öyrənməkdir. Layihə çərçivəsində Bakı Kitab Mərkəzində mütəmadi seminarların keçirilməsi nəzərdə tutulur.