İyunun 20-də Bakı Kitab Mərkəzində Rusiyada yaşayan həmvətənlimiz, yazıçı Adil Quliyevin “Xüsusi təyinatlı” romanının təqdimatı keçirilib. Yazıçı İlham Əzizin aparıcılığı ilə keçirilən təqdimatda kitabın redaktoru, yazıçı Şərif Ağayar, AYB-nin katibi Elçin Hüseynbəyli, tərcüməçi Tahir Dövlətoğlu, yazıçılar Səfər Alışarlı, Şəlalə Hüseynova, Nadir Yalçın, ədəbiyyatşünas Cavanşir Yusifli və digər qonaqlar çıxış edərək roman haqqında təəssüratlarını bölüşüblər. Çıxışlar bitdikdən sonra müəllif oxucular üçün kitabını imzalayıb. Qeyd edək ki, “Xüsusi təyinatlı” Adil Quliyevin Bakıda çap olunan sayca üçüncü kitabıdır.  Roman ötən əsrin 90-cı illərində torpaqlarımızın işğalından tutmuş 2023-cü il sentyabrın 19-da keçirilən antiterror əməliyyatına qədər gərgin hadisələrlə dolu geniş tarixi dövrü əks etdirir. Hadisələr yaşlı babasından başqa bütün yaxınlarını Xocalıda itirən Aslanın həyatı fonunda əks olunur.