Aprelin 19-da Bakı Kitab Mərkəzində Heydər Əliyev Fondunun dəstəyi ilə “Azərbaycan İrəvanı” sənədli filminin nümayişi olub. 
Fortis Construction şirkətinin “Fortis Films” layihəsi çərçivəsində hazırlanan “Azərbaycan İrəvanı” sənədli filminin təqdimatında Azərbaycanın mədəniyyət, elm xadimləri, rəsmi şəxslər və digər qonaqlar iştirak ediblər.
Qeyd edək ki, film Gürcüstan Milli Muzeyinin tarix və etnoqrafiya institutunun direktoru Eldar Nadiradzenin “İrəvan xanlığı” kitabının əsasında çəkilib.
Nümayişdən əvvəl Bakı Kitab Mərkəzinin direktoru Günel Rzayeva, “İrəvan xanlığı” kitabının müəllifi Eldar Nadiradze, kinorejissor Mirsadıq Ağazadə və tarix üzrə tədqiqatçı Fuad Axundov tamaşaçılar qarşısında çıxış ediblər.
“Bu film Fortis Construction şirkəti ilə birgə hazırlanan onuncu layihəmizdir. Film vaxtilə çiçəklənən İrəvan xanlığının Azərbaycan xalqına məxsus maddi-mədəni irsin tamamilə məhv edilmiş indiki Yerevan şəhərinə çevrilməsinin bir əsrlik tarixindən bəhs edir, Cənubi Qafqazın mühüm mərkəzlərindən birinin unudulmuş tarixinin üzə çıxmasına imkan verir”, - deyə Fuad Axundov bildirib.
Professor Eldar Nadiradze öz növbəsində bildirib ki, onun İrəvan xanlığı haqqında yazdığı kitabında İrəvan xanlığının tarixi, xanlığın Azərbaycan tarixindəki rolu haqqında ətraflı məlumat, Gürcüstan Milli Muzeyində 150 ildən artıq saxlanılan nadir eksponatların fotoşəkilləri öz əksini tapıb. “Azərbaycan tarixinin araşdırılmasına verdiyim töhfədən çox şadam”, - deyə Gürcü alim vurğulayıb.
Sonra “Azərbaycan İrəvanı” sənədli filmi izlənilib.
Qeyd edək ki, filmin rejissoru Mirsadıq Ağazadə, müəllifi və aparıcısı Fuad Axundov, prodüseri Səbinə Uluxanovadır. Film rus dilində Azərbaycan subtitrləri ilə hazırlanıb.