Aprelin 15-də Bakı Kitab Mərkəzində Dövlət İmtahan Mərkəzi (DİM) tərəfindən hazırlanmış "Azərbaycan dili bacarıqları üzrə səviyyələrə dair tələblər” adlı Azərbaycan dili üzrə Sertifikasiya imtahanı (ADSİ) üçün metodik vəsaitin təqdimatı keçirilib. Təqdimatda Heydər Əliyev Fondunun vitse-prezidenti Leyla Əliyeva, elm və təhsil naziri Emin Əmrullayev, Dövlət İmtahan Mərkəzinin sədri Məleykə Abbaszadə, Azərbaycanın tanınmış elm, mədəniyyət və ictimaiyyət xadimləri iştirak edib. 
Proqram haqqında məlumat verən DİM sədri Məleykə Abbaszadə Azərbaycan dilinin sertifikasiyası imtahanının dilin səviyyəsini müəyyən etmək üçün vacibliyini vurğulayıb.
Tədris proqramının və test modelinin həmmüəllifi Səbinə Əliyeva, Dövlət İmtahan Mərkəzinin əməkdaşı Mehriban Cəfərsoy, “Azərbaycan dili bacarıqları üzrə səviyyələrə dair tələblər” proqramının redaktoru Jalə Qəribova təqdim olunan vəsaitin mahiyyətindən danışıblar.   
Azərbaycan Dillər Universitetinin rektoru, akademik, yazıçı Kamal Abdulla, Milli Məclisin deputatı, akademik Nizami Cəfərov, Dövlət Dil Komissiyası yanında Monitorinq Mərkəzinin direktoru Sevinc Əliyeva bildiriblər ki, bu kitab xaricilərin Azərbaycan dili biliyi səviyyəsinin müəyyənləşdirilməsi, dilimizin sevilməsinə, işgüzar dilə çevrilməsinə kömək göstərəcək. 
Qeyd edək ki, Azərbaycan dilinin səviyyələr üzrə imtahanına hazırlaşanlar üçün nəşr edilən metodik vəsait Dövlət İmtahan Mərkəzinin (DİM) Direktorlar Şurasının sədri Məleykə Abbaszadənin rəhbərliyi ilə Azərbaycan Dillər Universitetinin əməkdaşları Səbinə Əliyeva, Hüzurə Ağayeva, Ramiqə Şirəliyeva və Fidan Ələsgərova tərəfindən dosent, filologiya üzrə fəlsəfə doktoru Jalə Qəribovanın redaktorluğu ilə hazırlanıb.