Yanvarın 25-də Bakı Kitab Mərkəzində XIX əsrdə Gürcüstanda yaşamış və Azərbaycana dəfələrlə səfər etmiş rus fotoqrafı Dmitri Yermakovun “Odlar yurduna səyahət” foto-albomunun təqdimatı keçirilib. Təqdimat mərasimində ölkəmizin mədəniyyət, ictimaiyyət və media nümayəndələri, eləcə də Gürcüstandan gələn fəxri qonaqlar iştirak edib.  
Bakı Kitab Mərkəzinin direktoru Günel Anarqızı bu kimi tədbirlərin Azərbaycan və Gürcüstan arasında dostluq və mehriban qonşuluq münasibətlərinin inkişafına böyük töhvələr verdiyini diqqətə çatdırıb.
Layihənin koordinatoru, Heydər Əliyev Mərkəzi Tədbirlərin və Sərgilərin Təşkili Departamentinin direktoru Əminə Məlikova kitab haqqında qonaqlara məlumat verib. 
Gürcüstan Milli muzeyinin baş direktoru David Lordkipanidze və muzeyin foto və fono-video kolleksiyasının kuratoru Sofiya Ebralidze çıxışlarında qeyd ediblər ki, D. Yermakovun çəkdiyi və topladığı fotoşəkillər Avropa ölkələrinin müxtəlif kolleksiyalarında mövcud olsa da, ən böyük arxivi Gürcüstan Milli Muzeyində saxlanılır. Qonaqlar kitabın işıq üzü görməsində əməyi keçən hər kəsə təşəkkürlərini bildirib.
Tədbirin fəxri qonağı, əfsanəvi gürcü müğənnisi Nani Breqvadze Azərbaycana olan sevgisini bu sözlərlə ifadə edib:  “Mən Azərbacan xalqını, sizin zəngin mədəniyyətinizi çox sevirəm. Xalqlarımız arasında həmişə oxşarlıq müşahidə edirəm. Muğamı Gürcü xalq musiqisi qədər sevirəm. Musiqi bizi daha da birləşdirir”. 
Qeyd edək ki, Heydər Əliyev Fondunun dəstəyi ilə hazırlanan "Odlar yurduna səyahət" adlı nəşr D. Yermakovun (1846 – 1916)  Azərbaycanla bağlı fotoşəkillər əsasında tərtib edilib. Albomda yer alan 260-dan çox unikal fotoşəkil 1880-ci illərin sonundan başlayaraq XX əsrin ilk illərinə qədər olan dövrü əhatə edir.