Fevralın 19-da Heydər Əliyev Fondu və Bakı Kitab Mərkəzinin təşəbbüsü ilə yaradılmış və BP Azərbaycan şirkətinin maliyyə dəstəyi ilə həyata keçirilən tələbə və gənclər üçün "YÜKSƏL" layihəsinin ikinci mərhələsi çərçivəsində Azərbaycan Milli Konservatoriyasının prorektoru Lalə Hüseynovanın “Musiqi: zövqlərin təmas nöqtəsi” adlı mühazirəsi dinlənildi.

Mühazirədə Azərbaycan Milli Konservatoriyası, Bakı Musiqi Akademiyası, Azərbaycan Dövlət Mədəniyyət və İncəsənət Universitetinin tələbələri iştirak etdilər. Tədbirin əvvəlində Baku Book Center-in layihə iştirakçılarına hədiyyə etdiyi, yaradıcılıq istedadını üzə çıxaran və inkişaf etdirən müxtəlif kitabların müzakirəsi oldu. Sual-cavab formasında keçirilən mühazirədə musiqinin klassik və müasir formalarının insanlara təsirindən bəhs olundu, ölkəmizdə musiqi tənqidinin, ciddi elm araşdırmalarının olmaması, musiqinin həyatımızın fonuna çevrilməsi problemləri vurğulandı.

Qeyd olundu ki, ailə və cəmiyyət gənc nəslin musiqi zövqünün formalaşmasında böyük rol oynamaqla yanaşı böyük məsuliyyət də daşıyır. Sonda iştirakçılara Lalə Hüseynova tərəfindən məsləhət görülmüş kitablar hədiyyə olundu.