Yanvarın 18-də Bakı Kitab Mərkəzinin və Bakı Şəhər İcra Hakimiyyətinin humanitar şöbəsinin birgə təşkilatçılığı ilə müharibə veteranları, qazilər, şəhid övladları və ictimaiyyət nümayəndələrinin iştirakı ilə “20 Yanvar – Müstəqilliyimizə gedən yol”  adlı tədbir keçirilib.
Tədbir iştirakçılarını salamlayan Bakı Kitab Mərkəzinin direktoru Günel Rzayeva bildirib ki, qəhrəman Vətən övladlarının mübarizə yolu gələcək nəsillər üçün əsl örnəkdir. "Qürurverici haldır ki, bu gün biz Qanlı Yanvar Faciəsini fərqli bir ovqatla anırıq. 44 günlük haqq savaşımız tarixdə görünməmiş bir zəfərlə başa çatdı! Bu gün biz tam qətiyyətlə deyə bilərik ki, biz xoşbəxt bir nəslin nümayəndələriyik. Çünki bizim taleyimizə 3 möcüzəni öz gözlərimizlə görmək və yaşamaq nəsib olub. Bu möcüzələrdən biri - 44 günlük Vətən müharibəsi, ikincisi - 2023-cü ilin sentyabrındakı 1 günlük antiterror əməliyyatı, üçüncüsü isə - Xankəndində Azərbaycan bayrağının dalğalanmasıdır. Bu möcüzələri yaradan isə Prezident, Müzəffər Ali Baş komandan, cənab İlham Əliyev və onun sərkərdəliyi ilə Azərbaycan ordusudur", deyə Günel Rzayeva əlavə edib.
Bakı Şəhər İcra Hakimiyyətinin İctimai-siyasi, humanitar məsələlər və dini qurumlarla iş şöbəsinin müdiri Elmin İmanov Azərbaycan tarixinin qəhrəmanlıq səhifəsi olan 20 Yanvar faciəsindən artıq 34 il ötdüyünu, həmin gün Azərbaycan xalqının milli azadlıq uğrunda mübarizə əzminin heç bir qüvvə tərəfindən qıra bilinməyəcəyini nümayiş etdirdiyini bildirib: "Eyni zamanda tarix göstərdi ki, şəhidlərimizin qanı yerdə qalmadı. Vətən Müharibəsi və sonrakı hərbi əməliyyatlar bir daha xalqımızın yenilməz, məğrur olduğunu dünyaya nümayiş etdirdi. Azərbaycan xalqı Prezident İlham Əliyevin ətrafında dəmir yumruq kimi birləşərək torpaqlarımızı əzəli düşməndən təmizlədi".
Sonra 3 saylı Uşaq-Gənclər İnkişaf Mərkəzinin  aktyorlarının ifasında “20 Yanvar – Müstəqilliyimizə gedən yol”  adlı ədəbi-bədii kompozisiya nümayiş etdirilib.
Tədbirin sonunda şəhid övladlarına Bakı Şəhər İcra Hakimiyyəti tərəfindən nəşr edilmiş “Heydər Əliyev və Azərbaycan tarixi” və Prezident İlham Əliyevin fəaliyyətinə həsr olunan  “Bizim böyük qələbəmiz” adlı kitablar və Bakı Kitab Mərkəzi adından hədiyyələr təqdim edilib.