Dekabrın 27-də Bakı Kitab Mərkəzində “Heydər Əliyev. 100 faktın tarixi” adlı kitabın təqdimatı keçirilib. Təqdimatda millət vəkilləri, ölkənin ictimai-siyasi xadimləri iştirak edib.
Kitabda Azərbaycan xalqının Ümummilli lideri, görkəmli siyasi və dövlət xadimi Heydər Əliyevin dövlətçilik fəaliyyətinin əsas istiqamətlərinə, ölkəmizin tarixindəki roluna dair 100 mühüm fakt yer alıb.
Layihənin ideya müəllifləri - Milli Məclisin deputatları Elnur Allahverdiyev və Soltan Məmmədov çıxışlarında qeyd ediblər ki, “Heydər Əliyev İli” çərçivəsində ərsəyə gəlmiş bu kitab geniş oxucu auditoriyası üçün nəzərdə tutulub.
Kitabın işıq üzü görməsinin məhz bu ilə təsadüf etməsinin mühüm hadisə olduğunu vurğulayan Milli Məclis sədrinin birinci müavini Əli Hüseynli kitabın xarici dillərə tərcümə olunmasının zəruriliyini qeyd edib.
Digər natiqlər – Milli Məclisin deputatı, İqtisadi siyasət, sənaye və sahibkarlıq komitəsinin sədri Tahir Mirkişili, Milli Məclisin deputatı Etibar Əliyev, AMEA-nın vitse-prezidenti, akademik İradə Hüseynova, Azərbaycan Yazıçılar Birliyinin katibi İlqar Fəhmi, kitabın elmi redaktoru Yahya Babanlı bu kitabın dəyərli məlumat mənbəyinə çevriləcəyinə əminliyini vurğulamış, Ulu öndərin həyat yolundan, onunla bağlı xatirələrdən danışıblar.