Dekabrın 7-də Bakı Kitab Mərkəzində məşhur rumın şairəsi, yazıçı, ictimai xadim, insan hüquqları müdafiəçisi Ana Blandiana ilə görüş və onun “İndi mən sənə ibadət edirəm” kitabının təqdimatı keçirilib. Qonağı təqdim edən Azərbaycan Yazıçılar Birliyinin katibi Səlim Babullaoğlu qeyd edib ki, bu yaxınlarda Ana Blandiana Vaqif Səmədoğlu medalına layiq görülüb. Həmin medal A. Blandianaya təqdim olunub.

Gecədə çıxış edən Rumıniyanın ölkəmizdə fövqəladə və səlahiyyətli səfiri Vasile Soare qeyd edib ki, 60-cılar ədəbi nəslinin görkəmli nümayəndəsi kimi tanınan Ana Blandiana mənsub olduğu ədəbi nəslin digər nümayəndələri ilə birgə Stalin rejiminin süqutundan sonra rumın şeirinin dirçəlişi, intibahı üçün böyük işlər görüb. Cənab səfir vurğulayıb ki, A. Blandiananın şeirlərinin ilk dəfə olaraq Azərbaycan dilinə tərcüməsi və sayca yüzüncü şeirlər kitabının nəşri Rumıniya və Azərbaycanın ədəbi-mədəni həyatı üçün olduqca əlamətdar hadisədir.

Gecədə A. Blandiananın təqdimatında "İndi mən sənə ibadət edirəm" kitabından şeirləri, Afaq Qarayevanın ifasında piano əsərləri səslənib. Sonda A. Blandiana şeirlər kitabını qonaqlara imzalayıb. Qeyd edək ki, Ana Blandiananın "İndi mən sənə ibadət edirəm" seçmə şeirlər kitabı Səlim Babullaoğlu və Jalə İsmayılın tərcüməsində Azərbaycan dilində nəşr olunub. Kitab Azərbaycan Yazıçılar Birliyinin "Ana Blandiananın Bakı görüşləri" ədədi layihəsi çərçivəsində hazırlanıb.