Dekabrın 4-də Bakı Kitab Mərkəzində litvalı hərbi jurnalist-fotoqraf, Xocalı soyqırımına həsr olunmuş “Sonsuz dəhliz” filminin həmmüəllifi Riçardas Lapaitis ilə görüş keçirilib. Görüşdə tanınmış şəxslər, incəsənət xadimləri və media nümayəndələri iştirak ediblər.

Riçardas Lapaitis ölkəmizdə hətta onunla heç vaxt şəxsən görüşməyən bir çox insan üçün dost olub. 90-cı illərin əvvəllərində Qarabağda cəbhə xəttində olan, bölgənin azərbaycanlı əhalisinə qarşı ədalətsizliyə, qəddarlığa şahidlik etmiş litvalı jurnalist və fotomüxbir gördüklərindən görməzdən gəlməyib, yaşadıqlarını dünyaya çatdırmağa çalışıb.

Şairə Nərminə Məmmədzadənin aparıcılığı ilə baş tutan görüşdə çıxış edən Riçardas Lapaitis 1992-ci ilin fevral ayında şahidi olduğu erməni vəhşiliklərindən danışıb, günahsız insanlara qarşı soyqırımı törətmiş ovaxtkı Ermənistan rəhbərliyinin hələ də cinayət məsuliyyətinə cəlb olunmamasından danışıb, beynəlxalq ictimaiyyəti Xocalı soyqırımını tanımağa çağırıb. Jurnalist bildirib ki, Azərbaycan rəhbərliyinin müdrik və uzaqgörən siyasəti təxminən 30 illik işğal tarixinə nöqtə qoyub. Sonda R. Lapaitis qonaqların çoxsaylı suallarını cavablandırıb.