Noyabrın 11-də TASS informasiya agentliyinin baş direktorunun birinci müavini, Rusiyanın Əməkdar jurnalisti Mixail Qusman Baku Book Center-in qonağı olub. Həmyerlimiz ilə görüş 9-cu Bakı Beynəlxalq Kitab Sərgisi çərçivəsində Bakıdakı Rus evi (Rusiya İnformasiya - Mədəniyyət Mərkəzi) ilə birgə təşkil olunub. 

Tədbirdə BKM-nin direktoru Günel Rzayeva çıxış edərək Bakıdakı oxucuların sonuncu dəfə Mixail Qusmanla görüşünün üç il əvvəl Bakı Kitab Mərkəzində keçirildiyini bildirib və məşhur jurnalistlə bu məkanda yenidən görüşməkdən məmnunluğunu ifadə edib.

Görüş açıq söhbət formatında telejurnalist Ceyhun Əlinin aparıcılığı ilə davam edib. İştirakçılarının çoxsaylı suallarını cavablandıran Mixail Qusman Bakıda keçirdiyi uşaqlıq illərindən, peşə fəaliyyətindən danışıb, jurnalistika və ədəbiyyat sahələrindəki təcrübəsindən, dünyanın bir çox ictimai və siyasi dövlət xadimlərindən götürdüyü müsahibələrdən, yazdığı kitablardan söz açıb. Görüşdə Rusiyanın Azərbaycandakı səfiri Mixail Yevdokimov və Bakıdakı Rus evinin rəhbəri İrek Zinnurov çıxış edərək Mixail Qusmana suallarını ünvanlayıb.