Noyabrın 2-də Bakı Kitab Mərkəzində Heydər Əliyev Fondu tərəfindən hazırlanan Azərbaycan bəstəkarlıq məktəbinin görkəmli nümayəndələrinin əsərlərindən ibarət not kitablarının musiqili təqdimatı keçirilib. 
Təqdim edilən notlarda Azərbaycan bəstəkarlıq məktəbinin 6 görkəmli nümayəndəsi - Asəf Zeynallı, Cövdət Hacıyev, Qara Qarayev, Fikrət Əmirov, Niyazi və Vasif Adıgözəlovun simfonik, kamera-instrumental, vokal, fortepiano, eləcə də müxtəlif alətlər üçün solo və xor əsərləri yer alıb.
Not kitabları Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın təşəbbüsü ilə həyata keçirilən “Əbədi imzalar” layihəsi çərçivəsində işıq üzü görüb. 
Könül Arifqızının aparıcılığı ilə keçirilən tədbirdə çıxış edən Bakı Kitab Mərkəzinin direktoru Günel Rzayeva, Mədəniyyət nazirinin müavini, Xalq artisti Murad Hüseynov, Bəstəkarlar İttifaqının sədri, Xalq artisti Firəngiz Əlizadə, Musiqi Akademiyasının rektoru, Xalq artisti Fərhad Bədəlbəyli, Xalq artistsi, dirijor Yalçın Adıgözəlov, Əməkdar artist, bəstəkar Vüqar Camalzadə nəşrləri yüksək dəyərləndirərək dahi bəstəkarların parlaq irsinin təbliğatı istiqamətində belə layihələrin əhəmiyyətindən və onların təqdimatının təşkil olunmasının vacibliyindən danışıb. Tədbirdə "Əbədi imzalar" filmi nümayiş olunub. Qara Qarayev adına Azərbaycan Dövlət Kamera Orkestrinin və Müslüm Maqomayev adına Azərbaycan Dövlət Akademik Filarmoniyasının nəzdində Azərbaycan Dövlət Xor Kapellasının musiqiçiləri təqdimatda Üzeyir Hacıbəylinin, Asəf Zeynallının, Qara Qarayevin, Fikrət Əmirovun, Niyazinin, Vasif Adıgözəlovun xor, mahnı və instrumental əsərlərini ifa edib.