Sentyabrın 29-da Bakı Şəhər İcra Hakimiyyətinin təşkilatçılığı ilə Bakı Kitab Mərkəzində  “Vətən müharibəsi tarixi – Şəxsiyyət faktoru” kitabının ərəb və fars dillərində nəşrlərinin təqdimatı keçirilib. Mərasimdə ölkənin tanınmış ictimai-siyasi, elm və mədəniyyət xadimləri, tarixçi alimlər, hərbiçilər, Millət vəkilləri, Vətən Müharibəsi veteranları və qazilər, Azərbaycandakı dini konfessiyaların nümayəndələri, ali məktəb tələbələri və hərbi liseylərin kursantları iştirak ediblər.
Tədbirin əvvəlində Vətən torpaqlarının azadlığı uğrunda şəhid olmuş soydaşlarımızın əziz xatirəsi bir dəqiqəlik sükutla yad edilib. Bakı Kitab Mərkəzinin rəhbəri Günel Rzayeva Vətən müharibəsində qazanılan Şanlı Qələbə və onun tarixinə həsr edilən bu kitabın əhəmiyyəti barədə danışıb. Daha sonra kitabla bağlı videoçarx nümayiş etdirilib.
Təqdimat mərasimində çıxış edən Bakı Şəhər İcra Hakimiyyətinin başçısı Eldar Əzizov bildirib ki, bu kitab Vətən müharibəsinin tarixinə həsr olunmuş ilk nəşrlərdən biridir. Kitabın əsas xüsusiyyəti Azərbaycanın Vətən müharibəsi tarixini tamamilə yeni bir rakursdan, şəxsiyyət faktoru baxımından nəzərdən keçirilməsindən ibarətdir. Yekdilliklə bir nəticəyə gəlinir ki, bütün bu uğurların, Şanlı Qələbənin kökündə şəxsiyyət faktoru - İlham Əliyev fenomeni dayanır. 
Təqdimatda çıxış edən AYB sədri, Xalq yazıçısı Anar,  Ailə, Qadın və Uşaq Problemləri üzrə Dövlət Komitəsinin sədri Bahar Muradova, Azərbaycan Milli Elmlər Akademiyasının Prezidenti, akademik İsa Həbibbəyli, AMEA Tarix İnstitutunun direktoru Kərim Şükürov artıq 6 dildə  çap edilən “Vətən müharibəsi tarixi – Şəxsiyyət faktoru” kitabının əhəmiyyətini qeyd edərək bu nəşrin Vətən savaşında qazanılan Şanlı Qələbənin geniş təbliğində mühüm rol oynayacağını vurğulayıblar. Emosiyasız, tarixi faktlar əsasında hazırlanan kitab  müəlliflərinin əsas məqsədi Vətən müharibəsi və dahi sərkərdə haqqında həqiqətləri gələcək nəsillərə çatdırılması olmuşdur.
Kitabın rus və ingilis dillərində nəşrləri dünyanın 100-ə yaxın ölkəsinin aparıcı kitabxanalarına göndərilib. Hazırda kitabın çin dilinə tərcüməsi üzərində işlər aparılır və bu prosses davam etdiriləcəkdir.  Tədbirin sonunda Xalq artisti Tünzalə Ağayeva  "Şuşam mənim" mahnısını ifa etdi.