Sentyabrın 15-də Bakı Kitab Mərkəzində “Ümummilli lider Heydər Əliyevin İKT strategiyası” adlı kitabın təqdimatı keçirilib. Layihənin rəhbəri - Rabitə və İnformasiya Texnologiyaları Mütəxəssisləri İctimai Birliyinin sədri Siruz Abasbəylidir. Layihənin əsas məqsədi  ümummilli lider Heydər Əliyevin uzaqgörən siyasətini, rabitə, İKT və rəqəmsal texnologiyaların tətbiqində zamanı qabaqlamaq bacarığını, ötən əsrin 70-80-ci illərində imzaladığı qərarların verdiyi töhfələri, müasir rabitə sisteminin verdiyi imkanları gənclərin nəzərinə çatdırmaqdır. 
Tanınmış jurnalist-publisist Qulu Məhərrəmlinin aparıcılığı ilə keçirilən təqdimatda Milli Məclisin deputatları Aqil Abbas, Qənirə Paşayeva, AMEA-nın Riyaziyyat və Mexanika İnstitutunun direktoru Misir Mərdanov, Əməkdar elm xadimi, professor Qəzənfər Paşayev, yazıçı, publisist, dövlət və siyasi xadim Xeyrəddin Qoca, Azərbaycan Yazıçılar Birliyinin sədr müavini, Mətbuat Şurasının sədri Rəşad Məcid və başqaları çıxış edib, layihənin həyata keçirilməsində əməyi olan hər bir kəsə minnətdarlığını bildirdilər. Görüşün sonunda müəllif qonaqlara imzalı kitablarını hədiyyə etdi.