İyunun 22-də Bakı Kitab Mərkəzində musiqişünas Tahirə Kərimovanın «Росчерк мастера на партитуре жизни» adlı kitabının təqdimat mərasimi keçirilib. Kitab dahi Azərbaycan bəstəkarı, SSRİ Xalq Artisti Fikrət Əmirovun həyat və yaradıcılığına həsr olunub. Tədbirdə çıxış edən mədəniyyət nazirinin müşaviri Cahangir Səlimxanov, Bakı Musiqi Akademiyasının rektoru Fərhad Bədəlbəyli, Əməkdar incəsənət xadimi Zümrüd Dadaşzadə, AMEA-nın müxbir üzvü, sənətşünaslıq üzrə elmlər doktoru Rəna Sarabskaya,“Mədəniyyət" telekanalının direktoru Ülviyyə Könül və başqaları böyük bəstəkar Fikrət Əmirovun yaratdığı zəngin musiqi irsindən danışarkən təqdim olunan kitabın Azərbaycan sənətşünaslığına böyük töhfə verəcəyinə əminliyini ifadə edib. Bəstəkarın oğlu, məşhur caz musiqiçisi Cəmil Əmirov kitabın müəllifinə və təqdimat iştirakçılarına minnətdarlığını bildirib. Tədbirdə, həmçinin, Fikrət Əmirovun əsərləri səsləndirilib.  Sonda Tahirə Kərimova Fikrət Əmirovla bağlı xatirələrini bölüşüb və oxucular üçün kitabları imzalayıb.