İyunun 7-də Bakı Kitab Mərkəzində Xalq yazıçısı Maqsud İbrahimbəyova həsr edilmiş “Maqsud əbədidir” (“Максуд навсегда”) adlı kitabın təqdimatı keçirilib. Heydər Əliyev Fondunun dəstəyi ilə nəşr olunan kitab Azərbaycanın əməkdar jurnalisti Nadejda İsmayılova tərəfindən hazırlanıb. Maqsud İbrahimbəyov Yaradıcılıq Mərkəzinin direktoru Anna İbrahimbəyova təqdim olunan kitab haqqında danışarkən qeyd edib ki, bu əsər təkcə Maqsud İbrahimbəyov haqqında olan xatirələrdən ibarət deyil, o, əsl bioqrafik romandır. Digər qonaqlar Maqsud İbrahimbəyov haqqında xatirələrini bölüşüb, yazıçının yaradıcılığından, onun zəngin irsindən söz açıb. Tədbirdə, həmçinin, rejissor Tərlan Rəsulovun səhnələşdirdiyi “Bağçada rahat yer” adlı eksperimental interaktiv tamaşa göstərilib. Maqsud İbrahimbəyovun “Püstə ağacı”, “Bağçada rahat yer” və “Əlvida, Miledi!” hekayələri əsasında hazırlanmış tamaşada Əməkdar artistlər Elşən Rüstəmov, Mələk Abbaszadə və Şahin Növrəsli fərqli ifaları ilə tamaşaçıları sevindirib.