Fevralın 24-də BKM-də xalq rəssamı Arif Hüseynovun “Qarabağnamə. Tarixin səhifələri” kitabının təqdimatı keçirildi. Tədbirdə kitaba daxil olmuş qravürlərdən ibarət ekspozisiya da nümayiş olundu.
 
Təqdimatda çıxış edən əməkdar incəsənət xadimi Ziyadxan Əliyev, Mədəniyyət nazirinin birinci müavini Vaqif Əliyev, xalq rəssamı Ağəli İbrahimov, xalq yazıçıları Anar və Natiq Rəsulzadə, əməkdar incəsənət xadimi Aydın Kazımzadə, alim, telejurnalist Etibar Babayev, «Təhsil Nəşriyyat-Poliqrafiya” MMC-nin baş direktoru Tural Axundov, Miniatür kitab muzeyinin rəhbəri Zərifə Salahova və b. qeyd etmişlər ki, Arif Hüseynovun qrafik rəsmləri Qarabağın azad mənzərələrini seyr etmək, havasını duymaq imkanını yaradır. Qravürlərdə əks olunan bəstəkar Üzeyir Hacıbəyli, şairə Natəvan, xarıbülbül, Qarabağ xanəndələri, tarixi döyüşlər, görkəmli hərbçilərimiz Cəmşid Naxçıvanski, Səməd bəy Mehmandarovun və başqalarının simaları yüksək bədii dəyəri ilə yanaşı, həm də tarixi əhəmiyyət daşıyır.
 
Tədbirin bədii hissəsində müğənni Qızılgül Babayeva, əməkdar artist, ud ifaçısı Yasəf Eyvazov, beynəlxalq müsabiqələrin laureatları Vüsal Aydəmirov və İbrahim Babayev çıxış etdilər.