Martın 2-də Bakı tarixinin tədqiqatçısı Fuad Axundov “Bakı rus şairlərinin poeziyasında” adlı mühazirəsi ilə BKM-də çıxış etdi. Mühazirə Heydər Əliyev Fondu və Bakı Kitab Mərkəzinin təşəbbüsü ilə yaradılmış və BP Azərbaycan şirkətinin maliyyə dəstəyi ilə həyata keçirilən tələbə və gənclər üçün "YÜKSƏL" layihəsinin ikinci mərhələsi çərçivəsində keçirildi.

F. Axundov sovet dövründə Bakıya gələn, burada bir müddət yaşayan rus şairlərinin əsərlərində bu şəhərin gözəlliyi və özünəməxsusluğunu vəsf etməsindən danışdı. O qeyd etdi ki, Bakı kəndlərinin koloriti, Azərbaycanın zəngin mədəniyyəti, xalqımızın adət-ənənələri və qonaqpərvərliyi rus şairləri üçün tükənməz ilham mənbəyi idi.

Tədqiqatçı Azərbaycan paytaxtına sevgisi ilə seçilən üç rus şairinin - S. Yesenin, V. Mayakovski və A. Gorodnitskinin yaradıcılığına diqqət çəkərək, onların şeirlərini oxudu, S. Yeseninin "Fars motivləri" silsiləsinin yaranma tarixindən, Mayakovskinin "Bakı.Küləklər şəhəri..." şeirindən, A. Qorodnitskinin "Bakı dəftəri"ndən, rus şairlərinin Azərbaycan ziyalıları ilə əlaqələrindən bəhs etdi.Mühazirənin sonunda tədbirə qatılan BDU, Azərbaycan Memarlıq və İnşaat Universitetinin tələbələrinə, eləcə də “Bir” tələbə könüllü proqramının nümayəndələrinə F. Axundovun tövsiyə etdiyi kitablar hədiyyə edildi.