Kitablar
Bakı Kitab Mərkəzində Rüstəm İbrahimbəyovun xatirə gecəsi keçirilib
19.04.2022
Bakı Kitab Mərkəzində Rüstəm İbrahimbəyovun xatirə gecəsi keçirilib

Aprelin 19-da Bakı Kitab Mərkəzində “Rüstəm İbrahimbəyovun əziz xatirəsinə ithaf” adlı gecə keçirildi. Mədəniyyət və incəsənət xadimləri, ictimaiyyət nümayəndələrinin iştirakı ilə keçirilən xatirə gecəsi xalq yazıçısı, kino sənətinin görkəmli nümayəndəsi Rüstəm İbrahimbəyovun həyat və yaradıcılığına həsr olunmuş  sənədli filmin nümayişi ilə başladı. 
Gecədə çıxış edən  xalq yazıçısı Anar, xalq artisti F. Bədəlbəyli, xalq rəssamı F. Xəlilov, xalq şairi R.Rövşən, BKM-nin direktoru G. Anarqızı, T.Quliyev adına 12 saylı musiqi məktəbinin direktoru, əməkdar müəllim G. Səfərova, yazıçı və ssenarist İsmayıl İmanov və digər natiqlər R. İbrahimbəyovun ədəbiyyat və kino sənətinə gəlişi, yaradıcılığı, yüksək insani keyfiyyətləri barədə söz açıb, onunla bağlı xatirələrini bölüşdülər. 
Aktyor Tural Əsədovun aparıcılığı ilə davam edən gecənin musiqili hissəsində pianoçu Nizami Əliyevin ifasında R. İbrahimbəyovun filmlərindəki musiqi parçalarından ibarət kompozisiya səsləndi. Sonra T. Quliyev adına 12 saylı müsiqi məktəbinin 7-ci sinif şagirdi Fatimə Mehdiyeva A. Zeynallının "Muğam üslubunda” əsərini ifa etdi.
Əməkdar artistlər Sahib Paşazadənin və Sevda Ələkbərzadənin möhtəşəm çıxışları tədbirə xüsusi rəng qatdı.
Gecə M. Maqomayev adına Dövlət Akademik Filarmoniyasının kamera orkestrinin ifasında Astor Piazzollanın “Oblivion” əsəri ilə yekunlaşdı. Xatirə gecəsinin sonunda R. İbrahimbəyovun oğlu Fuad İbrahimbəyov və qızı Fatimə İbrahimbəyova ailəsi adından gecənin təşkilatçılarına və iştirakçılarına minnətdarlığını bildirdilər.

 

Sizə necə kömək edə bilərik?