Aprelin 13-də Bakı Kitab Mərkəzində “Canlanan Hərflər” adlı kitabının prototipinin təqdimatı keçirilib. Üçölçülü əlifba kitabı konsepsiyasının müəllifi Tamilla Abbasova, artırılmış reallığın müəllifi Şəlalə Salamzadə, layihə rəhbəri - mədəniyyət siyasəti və art menecment üzrə ekspert Cahangir Səlimxanovdur.
Çıxış edənlər layihənin mahiyətindən söz açaraq, təqdim olunan vəsaitin məktəbəqədər uşaqların bədii yaradıcılığını, estetik, vizual bacarıqlarını, nitqini, diqqətini, yaddaşını, məntiqi təfəkkürünü inkişaf etdirmək üçün zəruri olacağına ümid etdiyini bildirib. Qeyd olunub ki, kitab uşaqlara ətraf aləmi daha aydın dərk etməyə, ətraf aləmə maraq göstərməyə kömək edəcək.
Tədbirə gələn uşaqlar təqdim olunan prototip ilə tanış olub, hazır material və fiqurların konstruksiyalarını kitabın içinə yapışdıraraq rəmzlər dilini əyləncəli şəkildə öyrəndilər.
Qeyd edək ki,  təqdimat Asmart Creative Hub-ın təşəbbüsü, Almaniya Federal Xarici İşlər Nazirliyinin, Goethe-İnstitutun və başqa tərəfdaşların IRF 2021 Mədəniyyət və  Təhsil Təşkilatlarına Beynəlxalq Yardım Fondu vasitəsilə  maliyyələşdirilən incəsənət xadimləri,  mədəniyyət fəalları və yaradıcı sahibkarlar üçün təlim proqramının bir hissəsidir.